謝德謙：英軍力爭首名避開與德國

歐國盃分組賽尾輪賽事，由榜首嘅英格蘭對第三嘅斯洛文尼亞，雙方為咗爭奪出線必定互相搏拳，而且英軍相信必定力爭首名避開與德國交手。

英格蘭上場與丹麥打成1比1平手，上半場憑著隊長哈利卡尼射入領先，但係半場前被對手一個遠射追平，最終雙方未能再添紀錄。英軍雖然位居榜首，但一眾球迷未必滿意球隊嘅表現，特別係上場比賽中後段更加被丹麥主宰球賽形勢。主帥修夫基自然成為眾矢之的，不過隊長哈利卡尼開腔力撑主帥，估計今場修夫基可能會一改上場保守踢法，釋放更多空間畀祖迪比寧咸及菲爾科頓進攻，務求以一場漂亮勝仗面對批評。

斯洛文尼亞上場同塞爾維亞以1比1打和，贊馬卡亞快速入楔先開紀錄，直到完場前一刻被對手把握角球機會頂入痛失 2分，出線立即大受影響。今場面對實力較高嘅英格蘭，相信斯洛文尼亞繼續沿用正選十一人應戰，對體能消耗較大，由於必須搶分，估計新星班捷文施斯高今場必定擔正去威脅英軍大門。以雙方實力比較加上英軍近期飽受壓力，估計今場英軍有望蘇醒取得漂亮勝仗爭取首名晉級。