冇酒賣畀英球迷　科隆酒吧：畀蘇格蘭飲晒

係人都知英倫三島球迷鍾意飲酒，咁啱科隆就有兩場分組賽係蘇格蘭對瑞士同英格蘭對斯洛文尼亞，酒吧生意好到不得了。

不過英國傳媒報道，經過上周六蘇格蘭打和瑞士，超過5萬名蘇格蘭球迷喺賽前同賽後狂歡，合共飲咗科隆100萬品脫（56.8萬升）啤酒，搞到成個城市冇酒賣。

有酒吧表示，預計會有近10萬「三獅兵團」球迷抵達科隆支持愛隊，由於星期日冇運輸開工，搞到佢哋嗌晒救命，驚冇酒賣畀英軍球迷，做唔到生意事少，如果英軍球迷因此搞事就麻煩。

德國當局都知冇酒賣會好大鑊，急Call唔同生產商，喺星期一同星期二，運咗近250萬品脫（約142萬升）啤酒應急，相信英軍球迷可以開懷暢飲。