曼聯推薦　辛祖願減薪投巴塞

查頓辛祖結束外借由多蒙特回歸曼聯，由於坦哈格留任，查頓辛祖又不獲買家承接，因此將再被外借，下個目的地極可能係巴塞隆拿，因為辛祖已表態，如果外借去巴塞，就願意減人工。

《每日體育報》報道，查頓辛祖回歸後，曼聯標價6,000萬歐元(約5.1億港元)轉會費，結果乏人問津，多蒙特同祖雲達斯均拒絕承接，曼聯只好將球員再度外借。

據報曼聯於今年4月曾向巴塞推薦查頓辛祖，但巴塞拒絕，連條件都冇傾，不過今次情況有變，巴塞換帥後，希望簽入一名翼鋒，將會認真考慮曼聯建議，據報周薪達25萬鎊(約250萬港元)嘅辛祖亦表明，如果加盟巴塞，就願意減薪。

外借巴塞嘅障礙清除後，嚟緊曼聯同巴塞將會正式接觸，據報巴塞將於7月15日做決定，確定是否借用辛祖。