【有片】英格蘭消極踢法惹公憤　修夫基遭掟杯襲擊

去片睇修夫基遭掟杯襲擊

https://twitter.com/i/status/1805710868073574844　

英格蘭雖然以歐國盃C組首名出線16強，但消極踢法惹起公憤，周三(26日)凌晨打和斯洛文尼亞0比0之後，領隊修夫基走到邊場，向「三獅兵團」球迷鼓掌致謝，反遭噓爆，更有人向佢掟膠杯，以宣洩不滿，令呢位53歲名帥非常尷尬。

英格蘭坐擁上季德甲神射手兼歐洲金靴獎得主哈利卡尼、英超最佳球員菲爾科頓、西甲最佳球員祖迪比寧咸，甚至後備席上仲有上季英超入22球嘅高爾彭馬，上季英超助攻王奧尼屈堅斯。

不過，領隊修夫基卻採用保守戰術，導致3場分組賽僅入2球，仲少過已出局嘅B組弱隊阿爾巴尼亞，英迷自然唔收貨，修夫基成為眾矢之的，佢走到邊場致謝，唔止噓聲四起，仲被人掟膠杯，唔講仲以為英格蘭出局。

最諷刺係英格蘭球員都同修夫基保持距離，一班人企埋另一邊，似乎驚會「中頭獎」，修夫基話明白球迷心情，但堅持戰術冇錯，睇怕英格蘭餘下賽事會繼續踢「悶蛋足球」。