200萬人口小國創奇迹　斯洛文尼亞首次晉身淘汰賽

周三(26日)凌晨歐國盃C組兩場比賽都打和0比0，根據OPTA統計，歐國盃史上首次出現同組最後一輪兩場都互交白卷，同時造就斯洛文尼亞首次晉身國際大賽(世界盃及歐國盃)淘汰賽，為呢個大約僅200萬人口嘅小國創造奇迹。

斯洛文尼亞晉級16強之後，對手仍待定，但球隊上下已經當正捧盃慶祝，因為佢哋自上世紀90年代脫離前南斯拉夫獨立後，首次晉身國際大賽淘汰賽。在此之前，斯洛文尼亞曾經參加2002、10年世界盃及2000年歐國盃決賽周，但都係分組賽出局，今屆終於取得突破，打入淘汰賽，意義重大，62歲領隊基克由2018年領軍至今，總算老懷安慰。

事實上，斯洛文尼亞人才輩出，門將奧比歷效力西甲勁旅馬體會，射手班捷文施斯高有「新夏蘭特」之稱，獲得阿仙奴等大球會垂青，斯洛文尼亞能夠成為今屆歐國盃一路奇兵絕非偶然。