祖高域做咗「黑腳」　塞爾維亞包尾出局

正喺英國溫布頓球場積極備戰嘅塞爾維亞網球天王祖高域，周二（25日）專程飛到德國慕尼黑力撐爭緊歐國盃嘅塞國球隊，但可惜做咗「黑腳」，塞爾維亞喺小組最後一場對丹麥0比0平手，包尾出局。

呢位網壇前世界「一哥」早前因傷退出法網，並且已完成膝蓋手術，正在恢復，近日祖高域已抵溫網作準備，不過，尋日歐國盃塞爾維亞對丹麥嘅關鍵一戰，呢位超級球迷飛到慕尼黑支持球隊，穿印有自己個名嘅「1號」國家隊球衣，高唱塞爾維亞國歌，更被大會攝影成功捕獲登上場館螢幕。

佢全場睇得肉緊，仲同粉絲自拍，相當投入，但係塞爾維亞最後同丹麥打和，無緣晉級，祖高域都相當失望。呢位擁有23個大滿貫冠軍嘅球星，雖然近日已經喺溫網進行恢復訓練，但佢日前話仲未決定係咪會參加，因為佢如果決定打，就係要贏冠軍。