柏利斯查趁美洲盃顯身價　勢離開曼聯

烏拉圭上場美洲國家盃分組賽以3比1擊敗巴拿馬，翼鋒法根度柏利斯查雖然冇波入，但創造多次具威脅攻門，贏盡掌聲，呢位22歲新星近年經歷喺曼聯嘅黑暗日子後，渴望把握今屆美洲盃證明身價，吸引其他球會注意，爭取永久轉會「脫魔」。

法根度柏利斯查球會生涯唔如意，但仍獲得烏拉圭主帥比爾沙信任，上仗以正選踢足全場，佢不負所托，有35次觸球，19次傳球有14次成功交畀隊友，包括2次進攻關鍵傳球，並搏到球2次罰球，為對手防線構成嚴重威脅，證明自己可以喺大賽立足。

法根度柏利斯查2020年由彭拿路加盟曼聯後，大部分時間被外借，包括今年1月被外借去西甲球隊CF格蘭納達，上陣15場入2球，可惜CF格蘭納達最終降班。柏利斯查深知重返曼聯，只會繼續坐冷板，準備提出永久轉會離隊，曼聯新股東拉特克利夫亦計劃出售邊緣球員，相信柏利斯查要求離隊，會方應該會放人，至於有冇買家接貨，柏利斯查喺今屆美洲盃表現成為關鍵，所以佢為前途一定搏命。