如果賣唔去　格連活特將參加曼聯季前集訓

格連活特外借基達菲完畢歸隊，名義上仍然係曼聯球員，雖然會方打算將佢出售，但買家遲遲未到價，據報如果兩星期內再賣唔出，曼聯將會畀格連活特參加季前集訓。

《每日鏡報》報道，拉素曾向曼聯斟介格連活特，不過只肯報價3,000萬鎊(約3億港元)，同曼聯心理價位相差至少1,000萬鎊(約1億港元)，難以成交。

曼聯同格連活特尚餘1年合約，拉特克利夫團隊仍然希望搵到合適買家，因為出售格連活特可為球會帶來純利潤，收回資金作增兵之用，只係願意重金收購格連活特嘅球會唔多。

紅魔鬼將於7月8日開始季前集訓，如果格連活特仍未出售，就會畀佢參加球隊集訓，雖然此舉可能引起球迷不滿，但到時可能要一邊操練，一邊搵買家。