盧卡古成「失機王」　3項數據遭瘋狂恥笑

比利時喺周四(27日)凌晨歐國盃E組，打和烏克蘭0比0，取得出線資格，但射手盧卡古表現仍然低迷，踢咗90分鐘只有2次射門。根據統計，呢位31歲前鋒今屆賽事，錯失6次入波黃金機會，3次入波被判無效，7次射中目標卻0入球，3項數據屬於各隊球員之冠，成為「失機王」。

盧卡古上季為羅馬各項賽事合共上陣47場入21球，佢喺月初為比利時踢熱身賽對盧森堡，射入2球，累積85個國際賽入波，超越匈牙利傳奇普斯卡斯，成為歐洲史上國際賽第2多入波球員。不過，盧卡古來到歐國盃，又出現「大戰隱形」弊病，而且非常黑仔，對斯洛伐克，兩次入波都被VAR推翻，第2場對羅馬尼亞，因為因膝頭同腳尖越位，又被判入波無效，遭網民瘋狂恥笑。

來到第3場對烏克蘭，盧卡古即使2次射門都中目標，但始終未能轉化成入波，結果今屆7次射門中龍，仍然食白果，把握力令人不敢恭維。比利時將於16強對勁旅法國，恐怕盧卡古入波機會更加渺茫。