今屆歐國盃10球「90+」入波　史上最多

周四(27日)凌晨歐國盃F組，土耳其憑後備上陣前鋒辛克杜辛補時4分鐘入波，以2比1擊敗捷克，取得小組次名出線資格，呢個入波亦成為今屆賽事第10粒「90+」補時出現嘅入球，超越2016年嘅9球，屬於歷屆賽事之中最多。

今屆歐國盃頻頻出現最後時刻入波場面，包括A組最後一輪東道主德國憑富克洛補時2分鐘建功，逼和瑞士1比1，驚險保住首名出線席位。B組克羅地亞成為「90+」入波最大受害者，第2場對阿爾巴尼亞，補時5分鐘被對手卡奧斯加素拿射入逼和2比2，第3場對意大利，更加戰至補時8分鐘，被薩卡尼射成1比1，成為出局主因。

土耳其對捷克除咗刷新單屆最多「90+」入球之外，仲創造另一項紀錄，今場總共出現18張黃牌及2張紅牌，屬於歐國盃史上單場最多牌數紀錄，當中土耳其有11位球員被出示黃牌，捷克2位球員安東連巴拿克、湯馬士祖利領紅被趕出場。