車仔執到寶　厄瓜多爾17歲新星美洲盃入波

周四(27日)早上美洲國家盃B組，厄瓜多爾以3比1擊敗牙買加，新星柏斯主射12碼入網，以17歲零53日成為美洲盃史上第2年輕入波球員，呢位天少球員已經落實將於明年夏天滿18歲，正式加盟車路士，車仔今次真係執到寶。

厄瓜多爾首仗不敵委內瑞拉之後，今仗不敢怠慢，一波就搶攻，並喺13分鐘打開紀錄，效力利華古遜嘅後衞軒卡派爾左路傳中省中對手，窄角度直接笠入網。

戰至上半場補時，厄瓜多爾獲得12碼，由柏斯主射入網，以17歲零53日成為美洲盃史上第2年輕入波球員，僅次於前哥倫比亞國腳蒙坦奴，佢喺1999年美洲盃射入阿根廷大門，當時只係16歲零171日。

換邊之後，牙買加由效力韋斯咸嘅前鋒米查利安東尼奧射入追番1球，並空群而出搶攻，希望收復失地，導致防線空虛，踢到補時，厄瓜多爾打反擊，由阿倫米達射成3比1完場，牙買加2戰2敗提早篤定出局。

同組另一場，委內瑞拉以1比0擊敗墨西哥，2戰2勝提早出線8強。