今屆邊支球隊最射得？奪標大熱英格蘭排尾五

歐國盃小組賽全部踢完，最後16強塵埃落定，總結一下小組賽有唔少有趣數據，同大家分享一下，被視為奪標大熱嘅英格蘭踢咗三場波，僅28次射門，喺咁多支參賽隊排名倒數第5。

跟據歐洲足協官網嘅統計，東道主德國以57次射門攻入8球，高居今屆射門次數排名榜榜首，果然火力大開，第二位係葡萄牙，佢哋有53次射門入左5球，跟住係土耳其，50次射門攻入5球。英格蘭就28次射門攻得2球，在24支球隊中排名20，反觀奧地利嘅入球比率唔錯，31次射門入6球排名17。

另外，好多球員都係「跑得之人」，一個統計球員速度嘅排名榜，斯洛文尼亞前鋒班捷文施斯高嘅跑速可達每小時35.9公里，係今屆速度最快嘅球員，而羅馬尼亞嘅米哈爾拿以時速35.8公里排第二，瑞士嘅丹尼杜耶輸少少，以35.6排第3，而法國球星基利安麥巴比唔知係咪受戴面罩嘅影響，錄得時速35公里。