失機又如何　AC米蘭斟盧卡古

盧卡古在歐國盃3場食白果，上場對烏克蘭頻頻失機睇到球迷拍晒枱，不過「渣古」仍然有人欣賞，據報AC米蘭近日派出團隊同盧卡古經理人接觸，商討轉會，盧卡古已回應不抗拒加盟。

盧卡古在羅馬外借期屆滿，已經返回車路士，不過雙方都唔打算合作，盧卡古尋求再度外借或離隊，意大利傳媒報道，車路士目標價格一再下調，由原本4,400萬歐元下降至3,000萬歐元(約3.67億港元至2.5億港元)，希望搵到新買家收購該比利時前鋒。

雖然盧卡古在歐國盃賽場遇到阻礙，但佢近年喺意甲已證明有立足能力，因此吸引AC米蘭斟介，雙方初步接觸得出正面結果，盧卡古並未拒絕，之後就等車路士同AC米蘭交涉。

另有報道指，拿玻里邀請干地出山執教後，亦打算利用干地同盧卡古嘅良好關係，邀請盧卡古加盟，不過前題係拿玻里要先出售域陀奧森漢，先會同盧卡古接觸。