德國解放富克洛　不過唔係取代夏維斯

德國喺歐國盃16強將會迎戰丹麥，唔少球迷都希望「後備殺手」富克洛可以擔正，據德國《圖片報》報道，呢位多蒙特前鋒有望獲得解放，不過佢唔係取代箭頭夏維斯，而係安排兩大前鋒拍住上！

富克洛3場分組賽都係後備，但有2個入球進帳，效率一流，據報佢嘅表現將獲得回報，對丹麥有望出任正選前鋒，而原本箭頭夏維斯就會移後出任進攻中場，代替表現平平嘅新星科利安華迪斯。

德國總監禾拉表示：「富克洛嘅入球紀錄非常神奇，而夏維斯對球隊亦非常重要，包括佢嘅用波、傳波、走位同頭槌，佢唔係傳統嘅箭頭，但一樣踢得好好。」德國上場逼和瑞士1比1，尾段就係將夏維斯拉開讓富克洛做箭頭，成功搵到追和嘅入波。