曼聯新星創造2球　烏拉圭大炒玻利維亞5蛋

周五(28日)早上美洲國家盃C組，烏拉圭以5比0大勝玻利維亞，效力曼聯嘅翼鋒法根度柏利斯查入1球及貢獻1次助攻，表現光芒四射，唔知紅魔鬼主帥坦哈格會唔會考慮留用呢位22歲新星呢？

烏拉圭今仗佔盡上風，開賽8分鐘，法根度柏利斯查近門頂入打開紀錄，跟住達雲紐尼斯射成2比0。換邊之後，烏拉圭繼續搶攻，麥斯阿拿奧祖亦建一功，佢同達雲紐尼斯一樣連續2場有入球進帳。

戰至81分鐘，法根度柏利斯查橫傳畀費達歷高華維迪射入，加上賓坦古亞埋齋，贈玻利維亞5蛋，2戰2勝排榜首。法根度柏利斯查今仗演出搶鏡，佢今年1月被曼聯外借去西甲球隊CF格蘭納達，盛傳有意今夏向曼聯提出永久轉會離隊，以柏利斯查近期出色表現，相信大把球會爭住簽佢。

C組另一場爆出冷門，主辦國美國1比2不敵巴拿馬，開賽18分鐘，美國前鋒添莫菲韋亞向對手動粗，被球證出示紅牌趕出場。雖然美國由科連拿巴洛根入波先開紀錄，但始終寡不敵眾，之後連失2球。巴拿馬喺88分鐘亦有球員被逐，但對戰局冇影響。