格魯吉亞富商超級重賞　贏西班牙獎金再加倍

格魯吉亞首次出戰歐國盃就殺入16強，舉國為之歡騰，億萬富商兼前總理伊萬伊什維利宣布，將會發放逾1,000萬歐元贏波獎金，而且球隊如果喺16強淘汰西班牙，獎金會再多一倍，相當和味！

格魯吉亞首富、執政黨「格魯吉亞夢想」創辦人兼前總理伊萬伊什維利，「格魯吉亞夢想」周四(27日)發聲明宣布：「3,000萬格魯吉亞拉里(約1,000萬歐元)獎金將會頒畀國家隊，同一時間，伊萬伊什維利為激勵球員，如果球隊成功再晉一級，將會額外再得到3,000萬格魯吉亞拉里獎金。伊萬伊什維利好多謝國家隊每名球員、教練同職員，拎到呢次歷史性同夢想嘅勝利。」

格魯吉亞今屆之前從未踢過世界盃或歐國盃決賽，今屆首次出戰國際大賽，喺3場分組賽拎到1勝1和1負，以小組第3名身份晉級16強，上場2比0擊敗葡萄牙更加係歷史代表作。