美斯受傷無緣鬥秘魯　阿根廷將輪換陣容

正在力爭衞冕美洲國家盃嘅阿根廷，爆出不利消息，球王美斯因為右腳肌肉受傷，將會缺陣周日(30日)早上最後1場分組賽對秘魯。

美斯近2場美洲盃分組賽對加拿大、智利，都以正選踢足全場，協助球隊2戰2勝，提早取得出線8強資格。據悉呢位37歲老將喺呢2場比賽之中，都感到肌肉痛，上仗更被智利球員踢中腿部，需要接受軍醫治療，可能令傷勢惡化，佢將會接受詳細檢查，先至知需要抖幾耐。

由於阿根廷已提早出線，所以就算美斯冇受傷，領隊史卡朗尼亦打算輪換陣容，佢話：「下場對秘魯，會畀前2場冇份踢嘅球員上陣，咁做比較公平，同時亦要觀察佢咃表現。」秘魯只有1分在手，如果今場贏唔到，就會出局。