【有片】超驚險！C朗幾乎被球迷飛腳踢傷

葡萄牙喺上場分組賽意外0比2不敵格魯吉亞，賽後出現瘋狂一幕，當C朗拿度離開球場嗰陣，一位球迷突然由看台高處跳落嚟，仲以「起飛腳」姿勢喺C朗面前「着陸」，稍有偏差足以將C朗踢到嚴重受傷。

葡萄牙上場輸波後，C朗喺保安陪同下離開球場，當佢哋行到球員通道前面，突然有球迷從天而降，雙腳更喺C朗面前踢過，嚇到呢位葡萄牙球星都愕住，攤開雙手表示無奈。雖然個球迷似乎並無惡意，但動作非常危險，場面相當嚇人。

C朗幾乎被飛踢片段：https://twitter.com/i/status/1806154168077373672　

葡萄牙之前對土耳其嘅分組賽，有多達6名球迷闖入球場企圖接近C朗，歐洲足協事後已表明會加強保安，估唔到再一次幾乎出事。葡萄牙領隊馬天尼斯亦曾警告，如果有人心懷不軌，會令球員人身安全受到嚴重威脅。