瑞士靠「博洛尼亞3寶」　撼意大利冇情講

瑞士喺歐國盃16強大戰意大利，賽前普遍被睇低一線，不過瑞士對於意大利足球絕不陌生，正選陣容有近半隊踢緊意甲，當中包括「博洛尼亞3寶」費奧拿、丹尼杜耶同艾比斯查。

瑞士有9個球員喺3場分組賽都踢正選，當中5個係意甲球員，包括國際米蘭門將恩尼森馬、AC米蘭後衞列卡度洛迪古斯，同埋費奧拿、丹尼杜耶、艾比斯查3位博洛尼亞球員，其中艾比斯查有1入波1助攻，丹尼杜耶亦入1球，博洛尼亞力量喺瑞士舉足輕重。

其實意大利都有博洛尼亞守將卡拉科利，不過佢今場停賽，費奧拿表示：「好遺憾冇得同卡拉科利交鋒，不過今場係瑞士對意大利，唔係博洛尼亞對意大利。今場對我意義重大，我喺意大利建立自己事業，亦為家人搵到一個理想嘅生活地方，但係今場係歐國盃16強，唔到我同意大利講任何感情，我唔怕意大利，瑞士亦唔會有任何懼色。」