曼聯今夏首簽曝光　巴塞中堅將強勢加盟

根據英國《泰晤士報》爆料，曼聯今夏首位收購球員已有定案，就係巴塞隆拿中堅朗奴阿拿奧祖，據悉紅魔鬼提出用5,000萬歐元(約4.17億港元)轉會費，再加上翼鋒查頓辛祖作為交易籌碼，有信心說服巴塞放人。

巴塞隆拿曾打算同朗奴阿拿奧續約，但呢位25歲烏拉圭國腳要求獲得稅前1,200萬歐元(約1億港元)年薪，呢間陷入財困嘅西甲球會無法滿足佢要求，結果引來拜仁慕尼黑、曼聯搶人。盛傳拜仁開出7,000萬歐元(約5.84億港元)轉會費，並向朗奴阿拿奧提供一份稅前1,300萬歐元年薪合約。

曼聯出手更加闊綽，開出稅前2,400萬歐元(約2億港元)年薪「肥約」利誘朗奴阿拿奧加盟，令佢難以拒絕。此外，紅魔鬼願意支付5,000萬歐元轉會費，再加查頓辛祖，亦令巴塞隆拿感到興趣，兩間球會有望一拍即合。

朗奴阿拿奧祖現時正在為烏拉圭出戰美洲國家盃，相信要等賽事結束之後，再處理轉會工作。