【有片】明奈操練球王片瘋傳 16強擔正！
2024年06月29日 08:00
東網電視
更多新聞短片
明奈分組賽後備上陣有好表現。(Getty Images)
今屆歐國盃演出備受批評嘅英格蘭，周一(1日)凌晨16強對斯洛伐克將會變陣，曼聯新星明奈取代干拿加歷查出任正選。呢位19歲中場近期狀態勁「弗」，日前操練期間一段瘋狂扭波嘅「球王片」被網民瘋傳，隨時成為英格蘭嘅救世主。
英格蘭坐擁多位天才球星，但分組賽踢到毫無霸氣，領隊修夫基對中場人選舉旗不定，頭2輪用阿歷山大阿諾特並唔成功，第3輪用干拿加歷查同樣冇乜效果，反而19歲嘅明奈喺2場分組賽後備上陣都搶鏡，據報今仗將會同迪格蘭賴斯合作鎮守中場。
明奈喺操練期間表現突出，網上瘋傳一段球王片，見到明奈喺訓練嗰陣被祖高美斯緊盯，但佢用幾下假身，再加一下後腳兼180度轉身成功令祖高美斯「食塵」，佢喺中場嘅活力同衝擊力，有望激發英格蘭進攻潛能。英格蘭兼曼聯名宿史高斯就非常睇好今次變陣：「明奈會令英格蘭踢到波，祖迪比寧咸同菲爾科頓會令英格蘭贏出比賽。」