文武雙全！耶馬宣布中學考試合格

西班牙逐鹿歐國盃期間，只得16歲嘅翼鋒耶馬仲要兼顧功課同考試，不過喺16強對格魯吉亞前，呢位巴塞隆拿球星就報喜，宣布佢嘅中學考試合格，可以專心一意喺淘汰賽為西班牙爭勝。

耶馬喺歐國盃前已透露，要帶埋功課去德國，練波以外時間要溫書同上視像課程，仲有最重要嘅第4階段ESO考試。耶馬喺16強開打前，向西班牙電台《Onda Cero》證實已收到考試合格嘅消息。

耶馬表示：「我考試合格，依家已經完成ESO啦！最後成績係點？老實講，我喺電話見到自己合格之後就冇再睇，然後就同媽媽講呢個消息。」據報耶馬未決定係咪繼續高中學業，定係專心發展足球事業。