重操故業？沙卡反對客串英格蘭左閘

英格蘭今屆歐國盃問題多多，左閘人選就係其中一大難題，勞基梳爾因傷缺席3場分組賽，捷比亞亦因小腿受傷上陣成疑，有意見指布卡約沙卡客串左閘會係其中一條「出路」，不過呢位阿仙奴球星已率先提出反對意見。

布卡約沙卡3仗都以右翼上陣，不過同英格蘭成條進攻線一齊「死火」，佢喺阿仙奴出道初期，被領隊艾美利安排踢左閘起家，直到阿迪達上任先幫佢定位右翼位置。英格蘭名宿伊恩胡禮同加利尼維利都提出，搵布卡約沙卡重操故業，可以解決英格蘭左路冇左腳球員嘅問題，亦可以將右翼騰出畀高爾彭馬上陣。

布卡約沙卡日前接受訪問回應：「我好鍾意伊恩胡禮，佢一直都好支持我，但我唔認為要我踢唔擅長嘅左閘，係解決問題方法。當然大家可以討論，而修夫基係做最終決定嘅人，我哋要相信佢嘅決定。」