意大利防線出事　3位大將或齊缺陣

意大利將於周日(30日)凌晨歐國盃首場16強對瑞士，賽前呢支衞冕球隊爆出不利消息，左後衞費達歷高迪馬高受傷，將無法披甲，中堅巴斯東尼患感冒，上陣成疑，加上另1位中堅卡拉科利停賽，意味防線3位正選可能一齊缺陣。

意大利上場對克羅地亞，費達歷高迪馬高帶傷上陣，可能因而令傷勢惡化，領隊史巴列堤出席記者會，表示呢位國際米蘭左閘肯定缺陣16強。至於巴斯東尼需要接受最後檢測，先至知道能否上陣。

除咗巴斯東尼、卡拉科利之外，史巴列堤仲有3位中堅可用，包括布安基奧奴、基安盧卡文仙尼、費達歷高加迪，其中基安盧卡文仙尼已肯定會頂替卡拉科利嘅位置。費達歷高迪馬高缺陣之下，可能由老將達美安出任左閘。