法比加斯出手　科木搶簽華拉尼

華拉尼將於6月30日約滿，以自由身離開曼聯，早已引起沙特阿拉伯、美職球會關注，根據「轉會權威」記者羅曼諾(Fabrizio Romano)爆料，下季意甲新升班球隊科木亦提出斟介，華拉尼將會前往意大利，同科木「影子主帥」法比加斯見面，傾加盟事宜。

科木上季獲得意乙亞軍，來季升上意甲，會方計劃大肆增兵，但礙於財力有限，向自由身球員埋手，正式邀請華拉尼加盟。呢位31歲法國中堅對於科木開出嘅條件，亦感到興趣，願意親自去意大利，同法比加斯見面，進行詳細會談。

法比加斯未有歐洲足協職業教練牌，只能暫時做助教，其實呢位西班牙名宿係球隊真正話事人，以「法比仔」嘅地位及影響力，或者可以說服華拉尼加盟。

早前有傳美職豪門國際邁亞密都想簽華拉尼，但佢傾向留喺歐洲主流聯賽，轉戰意甲都係唔錯選擇。