塞爾維亞出局前　門將被爆酒吧毆鬥

塞爾維亞喺分組賽3戰只得2和1負，排C組包尾黯然出局，據塞爾維亞傳媒爆料，後備門將雲查米連高域沙域，喺分組賽最後一仗對丹麥前，曾經捲入酒吧打鬥事件，領隊史杜高域返國後言論更火上加油，有傳佢嘅帥位將會不保。

據報塞爾維亞喺第2場分組賽對斯洛文尼亞後，曾畀球員放假1日，而雲查米連高域沙域就喺慕尼黑一間酒吧鬧事，有消息指佢係因為被酒吧保安禁止入去而爭執郁手，亦有指佢係被塞爾維亞球迷認出後，批評佢唔應該出現喺酒吧而發生衝突。

史杜高域返國後被問到呢件事，佢就回應：「當你喺慕尼黑酒吧飲醉，喺訓練又打交，就係一件醜聞。」雖然佢事後澄清言論只係「假設性」，但已令事件火上加油。據當地傳媒消息，塞爾維亞足總準備換帥，而前德國領隊勒夫係目標人選。