拿高斯文做好戲　一場雷雨成轉捩點

德國喺歐國盃晉級8強，佢哋對上一次躋身8強係2016年，當年只得28歲嘅拿高斯文仲未正式展開領隊生涯，不過今場佢嘅變陣同調動就獲得成功，而且仲趁住上半場因雷雨暫停比賽，即時檢討戰術並獲得最後勝利。

拿高斯文今場變陣效果唔錯，大衞拉林製造12碼、尼高舒洛達碧克就有助攻，尾後改用3中堅成功穩住勝局，執教表現大獲好評，拿高斯文賽後表示：「我哋有13至14個球員係核心，會視乎訓練表現作出輪換，球員開始明白自己有幾好，如果可以保持今場頭20分鐘表現，德國會難以被擊敗。」

德國今場早段攻勢凌厲，不過丹麥企穩陣腳後開始反撲，但35分鐘因天氣惡劣而暫停約25分鐘，令拿高斯文有機會再做調整：「喺比賽暫停期間我做咗啲調整，我哋睇番早段嘅影片做分析，因為我想更加快速深入丹麥嘅後防，球員都做得好好。」