意大利失去了一切　當拿隆馬證實這消息

意大利喺歐國盃16強慘淡出局，門將基安盧基當拿隆馬最勞氣，形容球隊失去一切，冇勇氣、冇精神，被淘汰係抵死，似乎暗寸主帥史巴列堤領導無方。

基安盧基當拿隆馬屬於意大利少數交足功課嘅球員，如非佢多次神救，恐怕今場唔止輸0比2。賽後呢位25歲鋼門接受傳媒訪問時怒氣沖沖話：「賽果令人好傷心、失望，出局係抵死，我哋需要向球迷道歉，我哋全場比賽陷入劣勢，失去太多控球權，畀對手有太多空間，整支球隊失去一切，非常迷失，冇勇氣、冇精神，事到如今，只能夠接受現實。」

意大利傳媒亦狠批「藍衣兵團」表現，認為全隊球員只有基安盧基當拿隆馬1人值得留低，其他人應該被踢出國家隊。事實上，意大利可以打入歐國盃16強，當拿隆馬有好大功勞，分組賽對西班牙，作出8次撲救，成為自2000年歐國盃托度嘅10次撲救後，意大利歐國盃史上單場第2多撲救門將，對克羅地亞，撲出莫迪歷嘅12碼，今仗勇救比列安保路嘅必入球。

基安盧基當拿隆馬左飛右撲搏到盡，但隊友卻放軟手腳，難怪佢嬲爆。