拿達路梅開二度　阿根廷冇美斯一樣贏

周日(30日)早上美洲國家盃A組最後一輪賽事，上屆冠軍阿根廷即使缺少受傷嘅球王美斯，但仍然憑拿達路馬天尼斯射入2球，以2比0擊敗秘魯，保持3戰全勝兼不失球，強勢迎接下仗8強賽事。

賽前阿根廷已提早獲得出線權，領隊史卡朗尼今仗輪換陣容，除咗美斯倦勤之外，亦收起另1位正選前鋒祖利安艾華利斯，並由前兩場442改為433陣式，用拿達路馬天尼斯、阿歷真度加拿祖、迪馬利亞負責攻堅。

阿根廷談笑用兵之下，仍然佔盡上風，上半場創造唔少攻勢，可惜未能入波。換邊後僅2分鐘，迪馬利亞妙傳，由拿達路馬天尼斯射入打開紀錄，呢位國際米蘭射手比賽末段再建一功，3場分組賽都有波入，合共有4球進帳，排射手榜第1位。

據悉美斯因為內收肌受傷，需要休息10至12日，能否復出踢8強賽事存在疑問，如果阿根廷再晉級，4強應該出得，幸好拿達路馬天尼斯狀態大勇，即使美斯缺陣，亦無損球隊攻力。

同組另一場加拿大同智利打和0比0，加拿大以次名出線，將於8強對B組首名，阿根廷對B組次名。