連續2屆踢走「王者」　瑞士創86年紀錄

瑞士繼上屆歐國盃16強淘汰2018年世界盃冠軍法國後，今屆擊敗衞冕嘅意大利，球隊自1938年之後，首次同一項國際大賽(世界盃及歐國盃)連續2屆打入8強，同時亦係近70年首次國際大賽贏意大利，創下兩項重要里程碑。

瑞士曾於1934及38年連續2屆世界盃進身8強，其後等到1954年以主辦國身份，再次打入8強。至於歐國盃成績方面，瑞士1996年首次打入決賽周，直至2016年突破分組賽晉級16強，上屆更進一步，憑互射12碼淘汰法國，打入8強僅不敵西班牙，今屆以壓倒性優勢擊敗意大利。

值得一提，瑞士近12次對意大利，終於首次贏波，對上一次贏係1993年世界盃外圍賽，如果單計國際大賽決賽周，瑞士上次擊敗意大利，已經係1954年。

瑞士足球水平不斷冒升，加上中場隊長格列沙加當旺，上季協助利華古遜成為德甲及德國盃「雙冠王」，嚟緊歐國盃8強，無論對英格蘭或者斯洛伐克，都未驚過。