英格蘭苦練「手榴彈」　東尼做秘密武器

英格蘭中前場個個都係天才球星，不過領隊修夫基嘅戰術就好唔掂，學玩傳控同後場組織，但16強對斯洛伐克90分鐘竟然冇出現中龍攻門，直到補時先至靠「手榴彈」戰術製造入波，加時致勝球亦係最簡單嘅高Q大棍踢法，傳統英式中鋒艾雲東尼就成為秘密武器。

英格蘭喺補時4分鐘先換入艾雲東尼，雖然呢位賓福特前鋒波都未掂到，但英格蘭就靠基爾獲加界球球「手榴彈」，由馬克古希二傳祖迪比寧咸射入。哈利卡尼賽後爆料：「我哋呢個星期練咗好多細節，幾日前仲練咗手榴彈戰術，覺得可能會有用。」

頭槌了得嘅艾雲東尼就係呢種戰術嘅核心，佢踢30分鐘有22次觸球，相比哈利卡尼踢105分鐘只得28次觸球，球隊戰術明顯搵佢嚟「轟」，加時佢就發揮空中威力，接應高波長傳頭槌Set畀哈利卡尼頂入。艾雲東尼賽後表示：「入波之前我同哈利卡尼講，一有波我就會頂去遠柱，慶幸佢真係有喺度等我。」