耶馬成西班牙進攻大腦　瘋狂數據媲美施丹

西班牙今屆歐國盃表現好有冠軍相，其中16歲球星耶馬非常搶鏡，佢喺16強大勝格魯吉亞4比1一役再交助攻，成為自2004年嘅C朗拿度後，首個單屆歐國盃交出2次助攻嘅20歲以下球員，而耶馬嘅射門、盤扭同助攻能力，已經同唔少傳奇球星睇齊！

耶馬喺右翼位置侵略性極強，今場創造6次機會，追平法比加斯嘅21歲或以下歐國盃單場創造機會紀錄，而且佢仲係歐國盃史上第2個單場有6+射門同6+創造機會球員，第1人就係2004年法國傳奇施丹。另外，耶馬今屆總創造機會(11次)同成功扭波(11次)都達到雙位數，屬今屆賽事唯一一人。

賽後宣布中學考試過關嘅耶馬表示：「好開心可以殺入8強，格魯吉亞係好難應付嘅對手，半場追平非常重要。我哋下一輪會對德國，同樣係好困難嘅對手，但我哋一定會拎出最大決心去準備呢場比賽。」