馬克古希下場停賽　英格蘭防線大鑊了

英格蘭戰至加時反勝斯洛伐克，驚險打入歐國盃8強，但亦付出沉重代價，中堅馬克古希因為累積第2張黃牌，下場對瑞士需要停賽，「三獅兵團」其他中堅人選經驗不足，防線存在重大隱憂。

開賽3分鐘，英格蘭後防出現失誤，馬克古希被逼用「超技術」阻止對手進攻，被球證出示黃牌，呢位23歲水晶宮新星上仗對斯洛文尼亞，亦拎咗1張黃牌，根據賽制，累積2張黃牌，需要自動停賽1場。

今屆歐國盃展開以來，英格蘭主帥修夫基一直用馬克古希同史東斯扼守中路，兩人4場賽事都踢足每1分鐘，馬克古希下場8強停賽，意味修夫基焗住改變中堅組合。

睇番其他中堅球員安斯干沙、李維士鄧克、祖高美斯國際賽經尚淺，安斯干沙、李維士鄧克分別只有5次、6次為英格蘭上陣，至於祖高美斯雖然有15次披甲，但呢位利物浦後衞比較擅長踢左右二閘，以往擔任中堅表現並唔可靠。3之中無論派出邊1位拍住史東斯，恐怕都畀唔到人信心。