明奈獲激讚　堅尼：我要用10年時間先至學到佢

英格蘭喺歐國盃16強對斯洛伐克，主帥修夫基派出19歲新星擔任正選，呢位曼聯中場交足功課，連以尖酸刻薄見稱嘅紅魔鬼名宿堅尼都對佢讚不絕口，話自己要用10年時間，先至學到明奈嘅踢法。

明奈今仗以19歲零72日成為英格蘭史上第3年輕以正選身份，踢大賽(歐國盃及世界盃)淘汰賽嘅球員，僅次於1998年世界盃嘅雲奧(18零198日)，2004年歐國盃嘅朗尼(18歲零244日)。

明奈喺開賽7分鐘就食咗1張黃牌，但並冇影響佢發揮，表現攻守兼備，今場踢咗84分鐘，傳球成功率達96%，1次關鍵傳球，2次射門，6次對抗有4次勝出。

賽後堅尼大讚呢位曼聯後輩：「我以前都踢過明奈嘅位置，以佢嘅表現，我要用10年先至學職，佢嘅基本功非常好，從重要大戰可見明奈應付自如。」修夫基之前試用阿歷山大阿諾特出任防守中場，但效果欠佳，相信8強對瑞士，明奈會繼續擔正。