一個原因　卡斯米路將留效曼聯

曼聯中場卡斯米路上季表現令人失望，多次傳出會方計劃今夏出售呢位32歲巴西國腳，但仍然未有球會接貨，英國傳媒指如果紅魔鬼要同卡斯米路解約，或者強行賣走佢，就必須賠償2,500萬鎊(約2.47億港元)薪酬，會方考慮到財政問題，可能留用卡斯米路。

早前傳出沙特阿拉伯豪門艾納斯有意收購卡斯米路，曼聯方面要求3,000萬鎊(約2.97億港元)轉會費，結果冇咗下文。據悉唔少沙特球會天價簽入球星後，發現經常貨不對辦，今夏增兵策略轉趨謹慎，特別係卡斯米路水平走下坡，而且周薪高達35萬鎊(約346萬港元)，令唔少球會卻步，曼聯要為佢搵買家，並非易事。除非卡斯米路願意大幅減人工轉會，或者曼聯向佢賠償餘下2年合約，總值2,500萬薪酬，當係解約。

曼聯上年都發生類似情況，原本同意將哈利馬古尼出售畀韋斯咸，但呢位中堅要求獲得薪酬補償，結果傾唔掂數，令交易告吹，卡斯米路今次可能歷史重演。