費林邦唔唱國歌之謎　因為佢唔識荷蘭話！

荷蘭今屆歐國盃表現麻麻，上季喺利華古遜踢到曉飛嘅謝利美費林邦，返到國家隊亦踢唔出水準，球迷自然「睇唔順眼」。謝利美費林邦今屆2場分組賽，賽前奏國歌環節全程合埋口唔肯唱，引起唔少質疑，但原因呢位翼鋒並唔係拒唱，而係唔識唱！

據荷蘭媒體報道，謝利美費林邦雖然喺阿姆斯特丹出世，但7歲就跟媽媽移民去英國，自細就學英文，有加納血統嘅媽媽亦會講家鄉話，但就係少講荷蘭話。謝利美費林邦表示：「我由細到大屋企都係講英文，媽媽會講加納方言Twi，但我嘅兄弟姊妹都係講英文。我仍然學習緊荷蘭話，依家都識少少，入國家隊我會更努力學習。」

報道指謝利美費林邦依家主要學足球上面嘅用語，所以同隊友溝通以及戰術理解都冇太大問題，依家唔唱國歌畀人捉嚟做話柄，相信謝利美費林邦要優先惡補番荷蘭國歌點樣唱！