「土耳其巴利」上位　英超3大豪門搶人

土耳其今屆歐國盃異軍突起，多位球員有出色表現，翼鋒巴列斯耶馬斯已引起各大球會注意，根據《利物浦回聲報》爆料，利物浦睇中呢位24歲射手，曼聯、熱刺亦加入爭奪，相信佢下季好大機會登陸英超。

雖然巴列斯耶馬斯今屆賽事仍未入波，但衝刺速度快、身體強壯，被指踢法似已退役威爾斯球星加里夫巴利，前土耳其國腳恩蘭透露，利物浦等大球會都對巴列斯耶馬斯有興趣，並認為佢可以喺頂級聯賽立足：「以耶馬斯嘅能力，可以勝任大部分英超球隊正選，佢係非常特別嘅球員，我擔任加拉塔沙雷助教期間，同佢合作多時，只要佢改善最後埋門一腳，相信將來要效力皇馬、巴塞隆拿、利物浦、阿仙奴都唔成問題。」巴列斯耶馬斯上季為加拉塔沙雷踢37場聯賽入6球，射術的確仍有待改善。

據悉加拉塔沙雷對於出售巴列斯耶馬斯持開放態度，如果有球會出2,100萬鎊(約2億港元)轉會費，就會放人，呢個數目對於英超豪門實在濕濕碎，達成交易機會甚高。