【官宣】鎌田大地投水晶宮　生涯第3隻鷹

水晶宮宣布，27歲日本國腳鎌田大地自由身來投，簽約2年，亦係佢轉戰歐洲效力嘅第3支外號同鷹有關嘅球隊，分別係法蘭克福鷹、拉素藍鷹同依家嘅水晶宮老鷹。

鎌田大地效力法蘭克福期間，曾經同水晶宮現任領隊格拉斯拿合作過，2021至22年球季一齊捧走歐霸盃，今次兩人喺水晶宮再相逢，水晶宮都好重視，用日本漫畫介紹呢位日本中場。

水晶宮官網表示：「鎌田大地係歐洲最好嘅進攻中場之一，佢嘅經驗同質素令球隊獲得絕佳嘅補充，好高興佢揀咗水晶宮，並再同格拉斯拿合作，相信球迷會喜歡佢。」

鎌田大地初出道時效力鳥棲砂岩，2017年展開旅歐生涯，加盟法蘭克福，5季上陣179場入40球，上季轉投拉素，上陣38場入2球2助攻，新球季將轉戰英超。