麥巴比被面罩拖累？冇品慶祝捱轟

法國前鋒基利安麥巴比今屆歐國盃表現令人失望，目前只靠12碼入過1球波，16強對比利時又再食白果，領隊迪甘斯就話佢被面罩拖累。麥巴比今場同比利時老將維頓漢多次埋牙，對手擺烏龍後，麥巴比竟然走去佢面前慶祝，落井下石嘅冇品舉動受到炮轟。

麥巴比今屆賽事15次埋門只入1個12碼，領隊迪甘斯賽後解釋：「佢開始習慣個面罩，不過流汗係個問題，有時會流入隻眼影響視力。麥巴比話係家睇嘢好似有3D效果，望正面冇問題，但側邊嘅視力會有延遲，但佢要喺未來幾星期或幾個月內熟習。」

麥巴比今場被37歲嘅維頓漢緊盯，下半場曾經喺禁區內被逼到跌倒，維頓漢不滿佢插水，麥巴比就喋喋不休咁投訴兼反擊，到完場前5分鐘維頓漢擺烏龍，麥巴比就專登走去佢面前大叫慶祝，唔少網民炮轟麥巴比行為幼稚，冇風度兼冇卡士。