麦巴比被面罩拖累？冇品庆祝挨轰

法国前锋基利安麦巴比今届欧国杯表现令人失望，目前只靠12码入过1球波，16强对比利时又再食白果，领队迪甘斯就话佢被面罩拖累。麦巴比今场同比利时老将维顿汉多次埋牙，对手摆乌龙后，麦巴比竟然走去佢面前庆祝，落井下石嘅冇品举动受到炮轰。

麦巴比今届赛事15次埋门只入1个12码，领队迪甘斯赛后解释：“佢开始习惯个面罩，不过流汗系个问题，有时会流入只眼影响视力。麦巴比话系家睇嘢好似有3D效果，望正面冇问题，但侧边嘅视力会有延迟，但佢要喺未来几星期或几个月内熟习。”

麦巴比今场被37岁嘅维顿汉紧盯，下半场曾经喺禁区内被逼到跌倒，维顿汉不满佢插水，麦巴比就喋喋不休咁投诉兼反击，到完场前5分钟维顿汉摆乌龙，麦巴比就专登走去佢面前大叫庆祝，唔少网民炮轰麦巴比行为幼稚，冇风度兼冇卡士。