比利时黄金一代谢幕？奇云迪布尼发烂渣

比利时喺欧国杯16强被法国淘汰，阵中多位老将都可能冇机会再踢国际大赛，当中包括33岁队长奇云迪布尼，佢赛后表示未决定去向，但被问到“黄金一代”嘅话题，呢位曼城球星突然发烂渣，仲闹记者系蠢才。

奇云迪布尼、夏萨特、卢卡古、高柏尼、维顿汉等比利时黄金一代，2018世杯勇夺季军，但上届世杯就分组赛出局，而近2届欧国杯亦系8强同16强止步，成绩未如人意。今次出局后，仍然在阵嘅“黄金一代”最后成员，包括奇云迪布尼、维顿汉、韦素、卢卡古等都未必可以喺4年后再战欧国杯。

被问到会唔会退出国家队，奇云迪布尼表示：“条问题问得太早，我要先消化今次失败，呢个球季好漫长，我要先畀身体休息，然后喺夏天再做决定。”有记者问到“黄金一代”未能打入大赛决定系咪好可惜，奇云迪布尼突然被辣着：“乜嘢系黄金一代？”记者回应：“你哋啰！”奇云迪布尼就话：“我哋？咁你即系话英格兰、西班牙、德国、法国唔系黄金一代？多谢晒！”镜头影到奇云迪布尼答完后拧晒头咁细声话：“蠢才”。