激戰區！葡法德西大混戰　C朗麥巴比只活1個

歐國盃8強出現超級激戰局，葡萄牙同法國周二(2日)凌晨驚險晉級後，將會喺8強正面交鋒，C朗拿度同基利安麥巴比兩代球王只能活一個。邊隊晉級嘅話，將會對住德國對西班牙嘅勝方，意味4大名牌只得1隊可以入決賽。

C朗同麥巴比係今屆兩大焦點前鋒，不過今屆表現麻麻，佢哋係今屆射門次數最多頭兩名，C朗有20次埋門(8次命中)但未有入波，而麥巴比就有15次埋門(6次命中)，但只入過1球12碼，8強兩大前鋒對決，佢哋嘅表現會係關鍵。

同一賽區仲有德國同西班牙兩大勁旅，亦係今屆表現最好嘅兩隊，無論入球數字、傳球成功率都排今屆頭2名，德國嘅穆斯亞拿同西班牙神童耶馬亦係今屆最佳新人熱門，可以話係冠軍前哨戰。

4大勁旅集合喺激戰區，相反表現令人失望嘅英格蘭，喺另一戰線就相對輕鬆，8強會對瑞士，如果晉級亦只會對奧地利或者羅馬尼亞，足智彩亦將「行運」嘅英格蘭列4.25倍奪標大熱。