尼高路簡迪破不敗紀錄　法國捧盃靠佢

法國被視為今屆歐國盃冠軍熱門，最初大家都估基利安麥巴比係鎖匙人，不過踢完4場比賽後，33歲嘅尼高路簡迪原來先係真正靈魂，法國有佢在陣嘅世界盃同歐國盃賽事，已經連續19場未輸過，成為歐洲史上第1人。

因傷缺席2年前世界盃嘅簡迪，上年轉戰沙特阿拉伯聯賽，估唔到闊別國家隊2年後喺歐國盃前獲重召，佢嘅表現亦證明領隊迪甘斯慧眼。簡迪近19次代表法國踢世盃同歐國盃，拎到13勝6和，係歐洲球員喺國際大賽最長不敗紀錄。

如果單計歐國盃，簡迪12次為法國出賽拎到7勝5和，亦打破西班牙名將沙維保持嘅11場不敗紀錄。法國今屆4場賽事只係失過1球，簡迪喺中場嘅掃蕩亦係重要因素。