擺烏龍冇問題　拿洛文迪即將加盟馬體會

正為西班牙出戰歐國盃嘅皇家蘇斯達中堅拿洛文迪，據《ESPN》報道，來季好大機會轉投另一支西甲勁旅馬體里體育會，雙方目前正展開談判，相信轉會費將高達3,000萬歐元。

27歲中堅拿洛文迪近年進步神速，上季喺皇家蘇斯達各項賽事上陣43場，幫球隊攞到聯賽第6名，同埋殺入歐聯16強。今屆歐國盃暫時4場更全部正選上陣，雖然佢曾經喺16強對格魯格亞擺下老烏，令西班牙一度落後，但整體演出仍大獲好評。

而上季喺聯賽失咗43球嘅馬體里體育會，就希望今夏可以簽入拿洛文迪，改善防守能力，同埋填補後防主力史提芬沙域、蘇恩祖離隊後空缺。據悉，馬體會有意將加蘭（Javi Galan）續借畀皇家蘇斯達，以減低拿洛文迪嘅轉會費。