教曼聯成黑歷史　奧地利主將力撐蘭歷克

奧地利成為今屆歐國盃驚喜球隊，德國領隊蘭歷克嘅逼搶戰術再創輝煌，雖然佢之前執教曼聯嘅經歷成為「黑歷史」，不過奧地利前鋒安祖斯韋文就表示，曼聯沉淪唔關蘭歷克事，寸爆指出「曼聯依家踢得仲衰」！

蘭歷克喺21年12月至22年5月執教曼聯，領軍29場只得11勝，唔夠38%嘅勝率係蘭歷克生涯新低，效力西布朗嘅安祖斯韋文表示：「喺曼徹斯特，我哋嘅教練唔太順利，但我覺得依家曼聯踢得仲衰過我哋領隊教嗰陣。所以就算喺英格蘭，都愈嚟愈多人識得欣賞蘭歷克。」

蘭歷克喺星期六(29日)度過66歲生日，因傷未有入選大軍，但仍然跟隊幫手嘅阿拉巴表示：「我哋同蘭歷克慶祝生日同食生日蛋糕，之後就即刻為下場比賽進行視像分析，佢有一番好感人嘅發言，大家都情緒高漲。」