曼聯另一炸彈　拉舒福特考慮去留問題

曼聯決定留用坦哈格，拉舒福特去留成為球隊一大難題，據報「福仔」同坦哈格已經決裂，打算同會方談判解決去留問題。

《曼徹斯特晚報》報道，拉舒福特上季除咗水準大跌，更因為紀律問題兩度受罰，包括去年10月輸畀曼城後搞生日P，以及今年初被揭在夜店流連，兩次都被坦哈格處分，兩人亦開始交惡。

拉舒福特上季續約後，周薪加到32.5萬鎊(約320萬港元)，雖然同坦哈格不咬弦，但坦哈格長期帥位不穩，隨時被炒，「福仔」冇諗過離隊，但依家坦帥獲留用，仲可以再教3年，逼使「福仔」開始考慮自己處境。

拉舒福特團隊近日接觸一間經紀公司，聘用對方管理合約事宜，稍後將同曼聯會方進行談判，決定去留問題。受財務及可持續規例限制下，曼聯出售自家青訓球員被視作純利，因此出售拉舒福特並非全無可能。