【官宣】熱刺簽列斯聯新星　轉會費3.9億

熱刺官方宣布，由列斯聯簽入18歲中場新星艾治格雷，據報轉會費高達4,000萬鎊(約3.96億港元)，簽約6年，將穿上14號球衣。

艾治格雷出身名門，父親安迪格雷、爺爺法蘭格雷，以及叔父艾迪格雷都係職業球員，佢15歲已經入選列斯聯一隊出場名單，當時列斯聯仲喺英超，不過並未上陣，直至上季降落英冠，艾治格雷喺揭幕戰亮相，全季上陣52場，包括升班附加賽決賽輸畀修咸頓，獲評為英冠最佳年輕球員。

熱刺官網隆重介紹呢位新星，特別強調佢參加過整個英格蘭青年梯隊賽事，包括為英格蘭U21上陣，在青年賽場擁有豐富比賽經驗，對佢寄望甚殷。

與此同時，熱刺宣布出售26歲威爾斯中堅祖朗頓去列斯聯，祖朗頓上季已外借到列斯聯，在英冠上陣50場，今次為賣斷，據報轉會約為1,000萬鎊(約9,900萬港元)。