威過比寧咸！艾達古拿交助攻同2R睇齊

土耳其今屆歐國盃一鳴驚人，只得19歲嘅艾達古拿更加成為球隊「當家」，今場球隊2個入波都係由佢嘅角球製造，4場歐國盃就有入波同助攻，成為「2R」C朗拿度、朗尼之後，歐國盃史上第3個20歲以下錄得入波兼助攻球員。

艾達古拿今年喺皇家馬德里上位，但鋒芒就唔及21歲嘅英格蘭天之驕子祖迪比寧咸，今屆歐國盃英格蘭同比寧咸都踢唔出水準，反而艾達古拿率領嘅土耳其愈戰愈勇。艾達古拿今場攻守兼備，2次創造機會交出1次助攻，仲有6次傳中同2次扭波過人，防守上亦有7次爭奪成功、4次重奪球權同2次搶截，非常全能。

土耳其57秒入波，就係艾達古拿嘅角球製造混亂，下半場角球更直接助攻美列迪美羅頂入，艾達古拿賽後表示：「美列迪美羅跳得好高，我嘅角球就係瞄住頭頂，好開心可以成功。今屆有入波同助攻令人興奮，但最重要係土耳其贏波，我慶幸可以為球隊作出貢獻。」