天助英格蘭？格列沙加受傷要做MRI

英格蘭今屆歐國盃跌跌撞撞打入8強，上輪淘汰斯洛伐克都好夠運，估唔到8強對手瑞士賽前爆出極壞消息，隊長格列沙加嘅內收肌出現問題，將要進行MRI(磁力共振掃描)檢查，對英格蘭上陣成疑。

瑞士媒體《觀察報》報道，格列沙加喺16強對意大利一戰上半場，已經因傷要接受治療，不過佢仍然頂足全場。呢位中場近日內收肌持續出現不適，瑞士足總已經安排佢做MRI，暫時未知傷勢有幾嚴重。

31歲嘅格列沙加係瑞士攻守命脈，今屆4場比賽有2場獲選為全場最佳球員，跑動距離、傳球次數、攔截次數等都係全隊第1，而且佢喺英超打滾過7年，對英格蘭球員非常熟悉，如果佢今場缺陣，英格蘭贏面將大大提高。