卡拉科利成搶手貨　倫敦雙雄展開爭奪戰

意大利喺歐國盃16強慘淡出局，但中堅卡拉科利演出仍然備受好評，根據「轉會權威」記者羅曼諾(Fabrizio Romano)爆料，英超倫敦雙雄車路士、阿仙奴不約而同睇中呢位效力博洛尼亞嘅22歲新星，將展開1場搶人才大戰。

卡拉科利雖然喺分組賽對西班牙，擺烏龍導致輸波，但生死戰鬥克羅地亞，表現大勇並貢獻助攻，成為出線功臣，無奈16強對瑞士停賽，眼白白睇住球隊被淘汰。

今屆歐國盃，卡拉科利同門將基安盧基當拿隆馬成為意大利隊內僅有2位表現獲好評嘅球員，卡拉科利更被譽「新尼斯達」，盛傳祖雲達斯今年2月已同佢達成個人待遇條款，準備今夏正式收購佢，但由於博洛尼亞不滿被祖記挖角搶走教練莫達，唔想將卡拉科利出售畀對方，並傾向賣畀其他聯賽球隊，車路士、阿仙奴財大氣粗，最大機會簽到卡拉科利。

據悉卡拉科利身價為3,300萬歐元(約2.77億港元)，但隨住倫敦雙雄加入爭奪，博洛尼亞有可能趁機加價。